Mandelkyss

12/12/2019

Berre av å lese namnet på desse, så kjenner du på glede over noko lite godt! Mandelkyssa er akkurat like behagelege å sette tenna i, som biletet gir inntrykk av. Deilig smak av mandel og mørk sjokolade vil straks breie seg i munnhola di. 


Eitt mandelkyss kan vere heilt perfekt! 


Ingrediensar:

  • 2 eggekviter (spar på eggeplomma og bruk dei i smoothie eller når du lagar saus)
  • 110 g sukrin gold (eller anna søtning du vel)

  • 140 g mandlar

  • 50 g mørk sjokolade (eg nyttar 70% kakaoinnhold)


Framgongsmåte: 

  1. Varme steikeomnen til 150 grader.
  2. Legg fram ei steikeplate med bakepapir. 

  3. Pisk eggekvitene stive i rein og tørr bolle.

  4. Tilset så litt og litt av sukrin gold (eller di type søtning), medan du held fram med å piske. Det skal framleis vere som marengs når søtninga kjem i. 

  5. Mandlane skal du knuse til mjøl. Bruk ei kjøkenmaskin eller ein blender, som eg nyttar for å gjere frø og nøtter om til mjøl. Tips: Viss du knuser med blender; Ha i ei begrensa mengde mandlar om gongen, slik at du lukkast til å få finmalt nøttemjøl/ mandelmjøl. Ha mandelmjølet i ei skål for seg sjølv inntil vidare.

  6. Bruk rein og tørr kjøkenmaskin eller blender vidare til å knuse sjokoladen.

  7. Blande mandelmjølet og knust sjokolade i felles skål.

  8. Vende så blandinga forsiktig med slikkepott inn i dei stive eggekvitene. NB! Ikkje blande for lenge, for då vil du slå "piffen" ut av dei stive eggekvitene og mandelkyssa vil flate ut under steiking. 

  9. Bruk ei ts til å få med deg ein klatt porøs deig på steikeplata. Av denne mengda får du om lag 18 stk mandelkyss.

  10. Steikast midt i omnen i om lag 15-20 minutt. 

  11. Etter steiking dreg du bakepapiret av steikeplata og over på ei rist. La dei heite mandelkyssa avkjøle seg heilt, før du smakar på eller legg i ei kakeboks. 


(Inspirert etter detsoteliv.no)

Facebook: Nupen KostogHelse Instagram: nupen_kostoghelse